Remdesivir, i cili është përdorur në muajt e fundit tek pacientët me Covid-19, duke përfshirë edhe Presidentin e SHBA-së, Donald Trump, ka pak ose aspak efekt në mbijetesën dhe përparimin e sëmundjes tek pacientët e shtruar në spital.
Lajmi erdhi nga Organizata Botërore e Shëndetësisë (OBSH), e cila kreu një test për katër ilaçe, duke përfshirë 11 mijë pacientë në 30 vende.
Sipas procesit të Solidaritetit të OBSH-së, remdesivir dhe tre ilaçe të tjera si lopinavir, ritonavir dhe ilaçi i malaries hidroksiklorokina dhe interferoni, duket se kanë pak ose aspak efekt tek pacientët e shtruar në spital për Covid-19.
Ishin të shumta shpresat e vendosura përgjatë muajve të fundit tek remdesivir, i cili është një ilaç kundër Ebolës, madje aq sa Bashkimi Europian njoftoi në fillim të muajit një kontratë për furnizimin e 500 mijë dozave shtesë të ilaçit antiviral, pasi sasia e këtij ilaçi ishte e kufizuar, për shkak të blerjes masive të tij nga SHBA.
Për më tepër, me gjithë dyshimet për efektivitetin e tij, remdesivir ishte ilaçi i parë që mori miratimin nga EMA -Agjencia Evropiane e Barnave- për trajtimin e rasteve të rënda të sëmundjes së shkaktuar nga koronavirusi i ri.
Studime të tjera kanë theksuar efektivitetin e ilaçit në shkurtimin e kohës së shërimit tek të rriturit e shtruar në spital me Covid-19.
Kujtojmë se ndërsa terapia me antitrupa është duke u testuar për pacientët me simptoma të lehta të sëmundjes, presidenti Trump mori një ilaç antiviral që normalisht u jepet pacientëve në gjendje të përkeqësuar dhe i cili fillimisht u krijua për të trajtuar një sëmundje tjetër virale, Ebolën.
Prodhuar nga kompania farmaceutike Gilead, remdesivir është ilaçi i parë për trajtimin e koronavirusit që mori miratimin për përdorim emergjent nga Administrata për Ushqimin dhe Ilaçet.
Ilaçi vepron duke ndërhyrë në mënyrën sesi virusi reagon për të prodhuar kopjet e tij gjenetike.
Megjithatë ai nuk është një ilaç që e shëron sëmundjen. Nuk është provuar për shembull se remdesivir-i ul rrezikun e vdekshmërisë.
Sipas një studimi, ai shkurton kohën e qëndrimit në spital.
Një studim tjetër zbuloi se pacientët që morën ilaçin remdesivir ishin në gjendje më të mirë sesa ata që u trajtuan me placebo./Re.D/Fjala.al
