Deputeti i PS-së dhe ish-ministri i Infrastrukturës dhe Energjetikës Damian Gjiknuri bënë bilancin e 8 viteve qeverisje, por dhe defektet e saj. Gjatë intervistës në emisionin HARD TALK NGA ROLAND QAFOKU Gjiknuri tha:
-Zoti Gjiknuri çfarë përgjigje keni ju si një politikan i rëndësishëm i PS kur raporti i KLSH ka përcaktuar si dëm ekonomik në 6 vjet 4 miliardë euro në arkën e buxhetit të shtetit?
-Raportet e KLSH janë raporte që jo gjithmonë qëndrojnë të vërteta.
-Ja ka futur kot Bujar Leskaj?
-Unë nuk e di kush e ka bërë atë, por patjetër dhe kot mund t’ia ketë futur. Për shembull kur u akuzuam që kishin humbur 430 milionë euro për çështjen me CEZ-in që duhej të futej te ajo llogari, nuk është fare e vërtetë dhe u verifikua edhe penalisht që nuk është e vërtetë. Ka folur drejtësia për këtë. Unë jam përballur me drejtësinë. Unë u akuzova, 600 milionë thoshin, një herë 430. Unë vajta u hetova plotësisht, u panë të gjitha bisedimet dhe akuzat ranë sepse negociata ishte zhvilluar me mbikqyrje ndërkombëtare dhe nga ana ekonomike shteti shqiptar nuk humbi asgjë. Përkundrazi, mbylli disa hemorragji të rënda financiare.
-Zoti Gjiknuri, si ndiheni ju që në tetë vite keni minus 300 mijë shqiptarë?
-Këto janë fenomene natyrore. Të mos i japim emblemë politike një tendence natyrore. Ky është një problem real por nuk është një problem që thjesht konstatohet duke thënë “ububu”. Problemi është si do bëjmë./Fjala.al/Ke.Ba
