Kreu i Partisë Demokratike, Lulzim Basha, foli sot për partinë e re të prezantuar një ditë më parë nga Jozefina Topalli “Lëvizja për Ndryshim”.
E pyetur nga gazetarët nëse i trembet përballjes me Topallin, kryedemokrati tha prerë se jo, duke shtuar se prioritetet e tij i përcakton interesi publik dhe askush tjetër.
“Jo. Nuk kam kohë për të humbur as me këtë çështje, as me asnjë person, kam prioritete të tjera. Prioritetet e mia i përcakton interesi publik, askush tjetër”, u shpreh Basha.
Ndër të tjera Basha tregoi edhe hapat e mëtejshëm të opozitës, nëse mazhoranca miraton sot në Kuvend ndryshimet në Kodin Zgjedhor. Basha tha se Rama është armik i shqiptarëve dhe i integrimit të Shqipërisë në BE. Sipas tij, hapi i radhës janë zgjedhjet e 25 prillit, ku opozita do të bëjë gjithçka për ta larguar.
“Problemi është se në krye të Shqipërisë sot është një armik i shqiptarëve. Ai po sakrifikon të ardhmen evropiane të shqiptarëve. Hapi i parë janë zgjedhjet e 25 prillit. Do bëjmë gjithçka për ta larguar një njeri që shkel mbi jetën e shqiptarëve, por edhe mbi të ardhmen tonë evropiane. Është një armik i dëshmuar i integrimit të Shqipërisë.
Kur po fusnim vendin në NATO, bënte demonstrata. Kur ishim gati të merrnim statusin kandidat, bllokoi tre ligjet. Tani, nëse i shkon marrëzisë deri në fund, po bllokon konferencën e parë ndërkombëtare, për shkak të makthit që e ka kapluar. E pret humbja më e thellë e ndëshkimi më shembullor.
Do të japë përgjegjësi për gjithçka ka kryer. Nuk ka formulë që shpëton Edi Ramën nga ndëshkimi popullor. Akti i vetëm i përgjegjshëm do të kishte qenë të zhvillonte zgjedhje normale, por sido që të jetë hakun do ta marrë. Nuk ka për t’i ikur hakut të shqiptarëve”, theksoi kreu i PD./Bl.Ba/Fjala.al
