Një tjetër pacient me koronavirus është hedhur nga kati i katërt i spitalit “Shefqet Ndroqi” duke e çuar në tre numrin e viktimave të vetëhedhur në këtë spital.
Raportohet se 52-vjeçari Preng Gjonaj, me origjinë nga Tropoja, ndodhej i shtruar tek “Shefqet Ndroqi” prej gjashtë ditësh.
Mësohet po ashtu se 52-vjeçari ishte në gjendje të rënduar dhe është hedhur nga dritarja e dhomës së tij.
Në lidhje me këtë ngjarje të rëndë, Drejtori i spitalit Shefqet Ndroqi, Perlat Kapisyzi i shprehu në emër të stafit mjekësor, ngushëllime familjes. Ai theksoi se deri në momentin e fundit të jetës pacienti Preng Gjonaj nga Tropoja nuk kishte shfaqur probleme të shëndetit mendor.
“Pacienti ishte i shtuar te ne më 25 tetor. Në emër të stafit të spitalit i shprehim ngushëllimet më të ndjera të sinqerta familjarëve të pacientit. Sipas të dhënave që kemi që nga shtrimi e deri në momentin e fundit, pacienti nuk paraqiste ndryshime apo shenja psikologjike jo normale.
Ky është një moment shumë i vështirë për ne dhe do të kërkonim mbështetjen e të gjithëve dhe ju për të vazhduar këtë luftë në shërimin e pacientëve. Atëherë, është momenti të respektojmë dhimbjen e familjareve dhe të mjekëve”, tha Kapisyzi.
Ndërkohë, vijon marrja në pyetje e familjarëve të pacientit. 52- vjeçari Preng Gjonaj nga Tropoja i ka dhënë fund jetës mëngjesin e sotëm rreth orës 03:10 minuta për arsye ende të panjohura plotësisht.
Ky është rasti i tretë që ndjek fatin tragjik të Hasan Mirës, 65 vjeç, i cili u hodh nga spitali “Shefqet Ndroqi”. Ai ishte shtruar në këtë spital në fund të muajit gusht dhe më 2 shtator ndërmori aktin e rëndë.
Ndërkohë, më 13 gusht një i ri në gjendje të rënduar psikologjike u hodh nga ky spital, ku fatkeqësisht ndërroi jetë. Xhino Koça, 29 vjeç ishte shtruar pasi ishte infektuar me koronavirus./Bl.Ba/Fjala.al
