Një tjetër triumf i topkëmbës së vajzave ka ardhur të martën, pasi Vllaznia e femrave ka kaluar në turin e dytë të Ligës së Kampioneve, pasi ka mundur pas 11-metërshave turket e ALG Sporit.
Koha e rregullt përfundoi me shifrat 3-3, teksa Bajraktarin realizoi vetëm në fundin e dy minutën shtesë të 30 minutave të kohëve shtesë dhe i dha mundësinë vajzave kuqeblu të provonin fatin nga goditjet nga pika e bardhë.
Dhe, natyrshëm, kualifikimi i Vllaznisë ka gëzuar edhe presidentin e FSHF-së, Armand Duka, i cili ka publikuar edhe një mesazh urimi pas ndeshjes.
“Jashtëzakonisht i lumtur me fitoren e sotme të Vllaznisë në turin e parë kualifikues të Ligës së Kampioneve ndaj kampiones së Turqisë, ALG Spor Kulubu!” – shkruan kreu i organizmit që qeveris futbollin shqiptar në një postim në profilin e tij në rrjetin social “Facebook”.
“Ka qenë një ndeshje vërtetë emocionuese dhe e luftuar deri në fund, – vijon Duka në mesazhin e tij. – Një arritje e shkëlqyer për vajzat kuqeblu, por edhe për futbollin e femrave. Le të shpresojmë që ky sukses të pasohet nga të tjera triumfe dhe Vllaznia të avancojë në fazën e grupeve të Ligës së Kampioneve.”
“Do të ishte një sukses i merituar për këtë ekip, por që njëkohësisht tregon se futbolli i femrave në Shqipëri është rritur në aspektin cilësor vitet e fundit. Urimet më të mira për drejtuesit e klubit, stafin teknik dhe shpresoj që Vllaznia të vazhdojë të jetë një burim frymëzimi për të gjitha vajzat që duan të luajnë futboll! Jemi krenar për ju”, – ka përfunduar mesazhi i Presidentit të Federatës Shqiptare të Futbollit, Armand Duka.
Pa.Va/Fjala.al
