Deputeti Halit Valteri në fjalën e tij në Kuvend ka folur edhe për afeksionin e kryeministrit Rama për kreun e PD-së Lulzim Basha, për të cilën shprehet se lidhja e tyre janë tenderët që merr kunatin i Lulit.
“Qasja juaj është afeksioni që keni për Lulzim Bashën. Lidhja juaj me Lulzim Bashën janë tenderët pafund që merr kunati i Lulit. I merr me bekimin dhe ndërhyrjen tuaj. Prandaj keni edhe aq shumë konsideratë për Lulin sa në çdo konferencë shtypi përpara gazetarëve nuk hezitoni ta shprehni. Ai mund të jetë çun i mirë, çun i bukur siç edhe shpreheni ju, por shqiptarëve nuk iu intereson kjo pjesë.
Ajo që na intereson të gjithëve është të zbërthejmë tentakulat e kësaj politike të pështirë që ju të gjithë së bashku ushtroni në këtë vend me 1001 halle e as nuk denjoni të bëni hapin më të vogël drejt përmirësimit të gjendjes social-ekonomike të qytetarëve. Nëse do t’ju mbushësh mendjen shqiptarëve se sa çun i mirë dhe se sa çun i bukur është Luli, rrit pagat dhe pensionet”, shprehet Valteri.
Më tej ai i drejtohet kryeministrit se nëse do t’ju mbushë mendjen shqiptarëve se Luli është më i mirë dhe më i bukur se Iliri, Saliu dhe Monika, krijo vende të reja pune dhe freno eksodin masiv të emigracionit drejt vendeve të BE.
“Investo në infrastrukturën rurale, mbështete bujqësinë, lehtëso financimin e biznesit të vogël, uli taksat për produktet e shportës, rrit asistencën sociale e cila është e vetmja formë mbijetese për mijëra familje, rrit pensionet që të moshuarit t’i kalojnë si bashkëmoshatarët e tyre europianë vitet e pakta që u kanë mbetur.
Përpara se të na thuash ne që, Luli është çun i mirë dhe çun i bukur, plotëso ato 15 pikat e Bundestagut gjerman për çeljen e negociatave se u bëre gazi i botës duke hapur shishen e shampanjës përpara çdo progres-raporti të KE e në përfundim realiteti është i njëjti si përpara vitit 2013. Shqipëria ka mbetur në vend numero.
Shqiptarët e dinë shumë mirë se status-quoja të intereson ty, Edi Rama, i intereson Lulzim Bashës, Ilir Metës, Sali Berishës dhe Monika Kryemadhit”, deklaron Valteri./Bl.Ba/Fjala.al
