Komisioni i Ligjeve ka rrëzuar me 14 vota kundër dekretin e Presidentit Ilir Meta për kthim në Kuvend të ligjit për “Gjendjen Civile”.
Në seancën e sotme të Komisionit të Ligjeve ishte i pranishëm dhe këshilltari i Metës, Bledar Dervishaj që parashtroi arsyet e kthimit të ligjit ndërkohë nga anëtarët e Komisionit vetëm 1 votoi pro dekretit dhe një abstenim.
Presidenti firmosi dekretin për ta kthyer për rishqyrtim, pasi sipas tij ky ligj synon të forcojë pozitat e mazhorancës në disa zona zgjedhore duke transferuar fiktivisht qytetarët.
Sipas tij në dekret shprehet qartë se mazhnoranca kërkon ta përdorë këtë nismë për qëllime politike dhe se në ato zona ku mazhoranca qeverisëse e ndjen veten të dobët politikisht, tashmë pa asnjë kufizim, mund të nxisë lëvizjen apo transferimin e gjendjes civile, në formën e vetëdeklarimit “të vonuar”.
Dhe për presidencën, ky ndryshim ligji nuk mund të bëhet në periudhën zgjedhore pasi do të sillte ndryshimin e numrit të mandateve për çdo zonë zgjedhore.
Por sot, shumica vendosi për rrëzim të dekretit dhe tashmë ai do të kalojë për votim në seancën e ardhshme në Kuvend./Bl.Ba/Fjala.al
