Policia franceze shkatërroi me dhunë një kamp të improvizuar të migrantëve në Paris, duke u përplasur me migrantët dhe aktivistët.
Policia u përball me akuza për përdorim “skandaloz” të forcës së tepruar. Ministri i Brendshëm i Francës, Gerald Darmanin, shkroi në Twitter se disa nga skenat ishin “tronditëse” dhe urdhëroi policinë të siguronte një raport të plotë mbi veprimet e tyre.
Kampi i ri u shfaq një javë pasi policia kishte shkatërruar një kamp më të madh, të paligjshëm të migrantëve, pranë stadiumit kombëtar francez në veri të Parisit.
Presidenti i Francës, Emmanuel Macron, ka miratuar një politikë të ashpër ndaj migrantëve të paligjshëm, shumë prej të cilëve, përmes Francës e shohin destinacionin e tyre përfundimtar – Mbretërinë e Bashkuar.
Vendet evropiane që nga viti 2015 janë përballur me rritje të numrit të migrantëve kryesisht për shkak të luftës në Siri dhe konflikte të tjera. Shumë azilkërkues ende jetojnë në kushte të pasigurta në Evropë, të pastrehë dhe të papunë./rel
