Trajneri i Kukësit, Skënder Gega, prej dy javësh është infektuar me virusin “Covid-19”. Dhe, teksa pritej që gjendja e tij të stabilizohej, ajo është rënduar dhe këtë e ka konfirmuar edhe klubi i Kukësit, teksa nëpërmjet një postimi shkruan se trajneri është nisur mëngjesin e të mërkurës drejt Stambollit, për trajtim të specializuar për mushkëritë.
“Kukësi njofton se trajneri Skënder Gega ka udhëtuar mëngjesin e sotëm drejt Turqisë, – thuhet postimin e shkurtër të klubit verilindor.”
“Gjendja shëndetësore e trajnerit u rëndua ditët e fundit dhe për një trajtim më të specializuar për mushkëritë, ka udhëtuar drejt Stambollit, – vijon më tej njoftimi në fjalë.
Koronavirusi i ka prekur mushkëritë trajnerit dhe gjendja e rënduar e ditëve të fundit e ka detyruar të shtrohet për një mjekim më të specializuar në një spital të njohur në Turqi. Drejtuesit e Kukësit kanë marrë të gjitha masat për t’i qëndruar pranë trajnerit në këtë moment të vështirë që po kalon.”
“Klubi i uron trajnerit shërim të shpejtë dhe rikthim sa më të shpejtë në krye të skuadrës”, – përfundon njoftimi i Kukësit. Ndërkaq, edhe Presidenti i FSHF-së, Armand Duka, ka reaguar pas lajmit për rëndimin e gjendjes shëndetësore të trajnerit të Kukësit, Skënder Gega, i cili është dërguar për trajtim të specializuar në Turqi. Përmes një postimi në rrjetet sociale kreu i qeverisë së futbollit shqiptar shprehet i shqetësuar për këtë lajm.
Ai uron që gjendja shëndetësore e Gegës të përmirësohet e ai të mund të kthehet sa më shpejt në fushat dhe stadiumet e futbollit për të dhënë kontributin e tij të pazëvendësueshëm. Gjithashtu, Presidenti Duka shpreh bindjen se Gega do ta fitojë edhe këtë betejë, siç ka bërë gjatë gjithë jetës së tij.
“Lajmi për rëndimin e gjendjes shëndetësore të trajnerit dhe mikut Skënder Gega më shqetësoi në këto ditë të vështira të pandemisë”, – shkruan Presidenti i FSHF-së në postimin e tij.
“Uroj, që sa më shpejt gjendja e tij të përmirësohet dhe ai të kthehet në fushat dhe stadiumet e futbollit për të dhënë kontributin e tij të pazëvendësueshëm. Kurajo Skënder! Jemi të gjithë me ty në këto çaste delikate dhe të vështira. Jam I bindur që ti do ta fitosh edhe këtë betejë, siç ke bërë gjatë gjithë jetës tënde”, – përfundon kreu i organizmit që qeveris futbollin në vend. Ndërkohë, në rrjetet sociala kanë vërshuar mesazhe solidariteti me trajnerin nga miq, bashkëkohës, sportistë, por edhe tifozë të thjeshtë./Bl.Ba/Fjala.al
