Tirana dhe Bylisi, afat 30-ditor për të shlyer detyrimet ndaj ish-trajnerit Mema dhe KF Shkodrës. Ka qenë një mbledhje me një program pune tepër të ngjeshur ajo e mbledhjes së të hënës në Komisionin e Disiplinës pranë Federatës Shqiptare të Futbollit, teksa kanë qenë plot 21 vendime të marra për ndeshjet dhe klubet e të gjitha niveleve të Kampionatit Kombëtar të Futbollit, por edhe Kampionatet e Moshave. Në fakt, midis morisë së vendimeve të karakterit sportiv, spikatin dy vendime që nuk kanë të bëjnë me fushat e blerta.
Kështu, Komisioni i Disiplinës i ka vendosur ultimatum klubi i Bylisit paralajmërohet që brenda 30 ditëve të shlyejë detyrimin financiar ndaj Vllaznisë për futbollistin Eridon Qardaku. Në fakt, klubi ballshiot është paralajmëruar për dështimin në ekzekutimin e vendimit nr. 19, të datës 30 janar 2020, të Dhomës Kombëtare të Zgjidhjes së Konflikteve, dhe i jepet afati 30-ditor në bazë të Nenit 62/1/a të Kodit të Disiplinës Sportive. Ndërkaq, organizmi disiplinor pranë FSHF-së i ka vendosur ultimatum edhe klubit të Tiranës për të shlyer financiarisht ish-trajnerin e bardhebluve Ardian Mema.
Në këtë vendim theksohet se 23-herë kampionët e Shqipërisë duhet të paguajnë rrogat e prapambetura të Memës. Kjo vjen pas dështimit në ekzekutimin e vendimeve nr. 22, të datës 07 korrik 2020 dhe nr. 22/1 datë 08 gusht 2020, të Dhomës Kombëtare të Zgjidhjes së Konflikteve, dhe klubit bardheblu i jepet afati 30-ditor në bazë të në bazë të nenit 62/1/a të Kodit të Disiplinës Sportive. Me pak fjalë, vazhdon saga e borxheve për Tiranën, me detyrime të pashlyera që vetëm grumbullohen.
Midis vendimeve të tjera të Komisionit të Disiplinës, spikati edhe ndëshkimi i zyrtarit të KF Burrelit, Kastriot Rama, i cili, për sjellje josportive ndaj kundërshtarëve, në bazë të nenit 47/2/a të Kodit të Disiplinës Sportive, dënohet me 8 (tetë) ndeshje pezullim nga aktiviteti.
l.m/Fjala.al
