Kuqezinjtë, nga vendi i 69-të, në atë të 66-të, Kosova mbetet në “vend-numëro”. FIFA ka publikuar të premten renditjen botërore të përfaqësueseve për muajin nëntor dhe falë sukseseve të arritura në 3 ndeshjet e fundit, Shqipëria ka ngjitur 3 shkallë, çka ishte e pritshme në mbyllje të këtij sezoni të dytë të veprimtarisë së dytë kontinentale të përfaqësueseve, Ligës së Kombeve të Evropës.
Falë triumfit në Ligën C të kësaj veprimtarie, që bëri që Kombëtarja e drejtuar nga trajneri Edoardo Reja janë ngjitur në vendin e 66-të në renditjen e organizmit që qeveris futbollin botëror, me 1,360 pikë të grumbulluara. Në 3 sfidat e nëntorit, Shqipëria korri 3 fitore nga po aq ndeshje, duke mundur 2-1 Kosovën në miqësore, ndërsa në Ligën e Kombeve i fitoi dy sfidat e fundit në shtëpi, 3-1 kundër Kazakistanit dhe 3-2 kundër Bjellorusisë.
Për më tepër, Kombëtarja e mbylli grupin e 4 të Ligës C në vend të parë dhe sezonin e ardhshëm të kësaj veprimtarie, do të luajë një nivel më lart, në Ligën B. Ndërkaq, përfaqësuesja e Kosovës në futboll nuk ka lëvizur nga vendi i 117-të në renditjen e FIFA-s për nëntorin dhe ka 1,155 pikë. “Dardanët” kanë qenë në vendin e 117-të edhe në muajin tetor, por në muajin nëntor nuk patën suksese të mëdha.
Në këtë muaj, Kosova e humbi 1-2 miqësoren me Shqipërinë, dhe vijoi të mundej në Ligën e Kombeve po me të njëjtin rezultat nga Sllovenia, por arriti sidoqoftë të fitonte me rezultat minimal në duelin e fundit të kësaj veprimtari kundër Moldavisë. Sa i përket renditjes së nëntorit, Belgjika vazhdon të mbajë vendin e parë, me 1780 pikë, ndërsa peshën e të parëve e plotësojnë Franca, Brazili, Anglia dhe Portugalia.
la.mi/Fjala.al
