Kompania amerikane “Moderna.Inc”, tha se do të aplikojë sot për autorizim emergjent në SHBA dhe Evropë për përdorimin e vaksinës së saj kundër COVID-19.
Rezultatet e testimit të fazës së tretë të vaksinës së kësaj kompanie, kanë treguar se ajo është efektive 94.1%, pa ndonjë shqetësim serioz të sigurisë.
Vaksina e “Moderna”-s, mund të jetë vaksina e dytë që pritet të marrë autorizimin e përdorimit emergjent në SHBA, këtë vit.
“Ne besojmë se kemi një vaksinë që është shumë efikase”, tha shefi për çështje mjekësore i “Moderna”-s, Tal Zaks. “Ne presim që të luajmë një rol kryesor në mposhtjen e kësaj pandemie”, tha ai.
Njoftimi i Modernas pason lajmet nga kompania tjetër, “Pfizer.Inc” dhe partneri gjerman “BioNTech SE”, që vaksina e tyre ishte 95% efektive. “Pfizer” ka aplikuar për autorizimin e përdorimit emergjent, një javë përpara “Moderna”-s.
Përveç regjistrimit të aplikimit të saj në SHBA, “Moderna” tha se do të aplikonte për miratim me kusht nga Agjencia Evropiane e Barnave.
Rezultati i fundit i efektivitetit të vaksinës së saj është pak më i ulët se një analizë e përkohshme e lëshuar më 16 nëntor, që tregonte një efikasitet prej 94.5%. Ky ndryshim, sipas zyrtarëve të kompanisë, nuk përbën ndonjë rëndësi të madhe, shkruan REL.
Në javët e fundit, rezultatet pozitive të vaksinave kanë ngjallur shpresat për t’i dhënë fund pandemisë që ka goditur ekonomitë, dhe ka marrë më shumë se 1.45 milionë jetë në të gjithë botën.
Këshilltarët e pavarur të Administratës Amerikane të Ushqimit dhe Barnave do të takohen më 17 dhjetor për të shqyrtuar të dhënat e provave të “Moderna”-s. Menjëherë pasi të fitojë autorizimin e përdorimit emergjent, kompania pret që vaksina të transportohet në pikat e caktuara të shpërndarjes në të gjithë Shtetet e Bashkuara të Amerikës./Bl.Ba/Fjala.al
