Tritan Shehu deklaron se vaksina në Shqipëri pritet të mbërrijë në gusht të vitit që vjen. Gjatë emisionit HARD TALK NGA ROLAND QAFOKU, mjeku i njohur Tritan Shehu e lidhi këtë me mungesën e kontratës që qeveria e PS nuk e ka nënshkruar ende.
-Kur do vaksinohen shqiptarët?
-Nuk ka asnjë perspektivë. Vaksina vjen duke firmos kontrata me kohë, duke bërë pagesat me kohë.
-Kur e parashikoni ju se do ndodhë kjo?
-Ne e kemi ngritur që në shtator se duhej gjetur menjëherë firma prodhuese. Fatkeqësisht ata u lidhën me një organizëm i cili punon për vendet e pazhvilluara, Covax, i cili është në organizëm i OBSH-së që ka marrë një financim të vogël nga BE, ndërsa qeveria amerikane nuk e ka financuar sepse e ka cilësuar si të pabesueshme. Është i përputhshëm me standardet e vendeve të pazhvilluara, kryesisht ato afrikane. Edhe me Covax nuk është bërë kontratë akoma, ka vetëm një marrëveshje mirëkuptimi. Covax merr përsipër maksimumi vetëm 20% të popullsisë. Dhe koha e sjelljes së vaksinave nga Covaxi është deri në fund të vitit 2021.
-Kur do fillojë?
-Me informatat që kam unë, Covax do fillojë të furnizohet nga korriku, dhe pastaj do fillojë shpërndarja në vendet që ka marrëveshje.
-Dhe kur vjen në Shqipëri?
-Unë mendoj se po të vazhdojë me Covax-in në Shqipëri vaksina do vijë nga gushti ose shtatori. /Fjala.al/Ke.Ba
