Princi i Britanisë së Madhe, Harry dhe bashkëshortja e tij Meghan, të martën falënderuan punëtorët esencial si dhe u ofruan kurajë të gjithë njerëzve që kanë vuajtur gjatë pandemisë së vitit 2020, përmes edicionit të parë të ‘podcastit’ të tyre të lancuar në Spotify.
Harry dhe Meghan, të njohur zyrtarisht si Duka dhe Dukesha e Sussexit, e prezantuan këtë episod së bashku si dhe bashkëbiseduan me yje të njohur të botës, si muzikanti Elton John, aktori dhe producenti Tyler Perry, kampionia e tenisit Naomi Osaka dhe të tjerë. Që të gjithë reflektuan mbi vitin që po e lëmë pas, si dhe i shprehën urimet e tyre për vitin e ri.
Gjatë transmetimit 33 minutësh, çifti i falënderoi punëtorët shëndetësorë dhe ata të frontit të parë, për gjithë sakrificat që kanë bërë gjatë këtij viti sfidues.
“Ne ju themi, pavarësisht të gjitha sfidave që jeta ua sjell, besoni kur ju themi, dashuria fiton gjithmonë”, deklaroi Meghan. “Dashuria gjithmonë triumfon”, shtoi Harry.
‘Podcasti’ i parë i çiftit mbretëror përfundoi me pjesëmarrjen befasuese të djalit 19 muajsh të çiftit, Archie Harrison Mountbatten-Windsor. Me ndihmën e prindërve të tij, Archie u tha gjithë dëgjuesve: “Gëzuar Viti i Ri”.
Duka dhe Dukesha e Sussexit, të cilët në fillim të këtij viti hoqën dorë nga obligimet zyrtare të familjes mbretërore britanike, dhe u zhvendosën për të jetuar në Kaliforni për t’i ikur vëmendjes së publikut dhe mediave, e kanë nënshkruar një marrëveshje ekskluzive dhe disa vjeçare me platformën e njohur Spotify.
Përveç marrëveshjes me Spotify, Harry dhe Meghan, kanë nënshkruar një marrëveshje bashkëpunimi edhe me platformën digjitale Netflix./Bl.Ba/Fjala.al
