Viti 2020 ishte një vit si asnjë tjetër më parë. Por edhe pse do të mbahet në mend më së shumti për pandeminë e coronavirusit, kishte edhe ngjarje të tjera që dominuan këtë periudhë 12-muajshe.
Fundi i Mbretërisë së Bashkuar në Bashkimin Evropian
Deputetët e Evropës e kanë përkrahur marrëveshjen e Brexit me 621 vota pro dhe 49 kundër, duke i hapur kështu rrugën Mbretërisë së Bashkuar të largohet nga Bashkimi Evropian.
Harvey Weinstein u dënua me 23 vjet, për përdhunim dhe ngacmim seksual
Producenti i filmave, Harvey Weinstein, u shpall fajtor për këtë vepër në një gjyq të New York-ut.
Vdekja e Kobe Bryant
Superylli i NBA-së ndërroi jetë më 26 janar në një përplasje helikopteri së bashku me tetë persona të tjerë, përfshirë vajzën e tij 13-vjeçare Gianna.
Lëvizja Black Lives Matter e cila shpërtheu në SHBA, reflektoi edhe në nivel global
Kauza e Black Lives Matter apo BLM, shpërtheu pas vdekjes së afro-amerikanit George Floyd më 25 maj të vitit 2020.
Floyd vdiq pasi njëri prej oficerëve gjatë arrestimit të tij ia vendosi gjurin në qafë për gati 8 minuta.
Shpërthimi masiv që shkatërroi Bejrutin
Më 4 gusht, ndodhi një shpërthim masiv në portin e Bejrutit në Liban, që i mori jetën 200 personave.
Një zjarr shkaktoi shpërthimin e 2,750 tonë kimikatesh, të cilat ishin ruajtur në portin detar të kryeqytetit libanez.
Protesta në Bjellorusi
Protestat në Bjellorusi shpërthyen në gusht pas rezultatit të zgjedhjeve presidenciale, ku doli sërish fitues Aleksandër Lukashenko. Ky i fundit thuhet se fitoi 80 për qind të votave.
Motivi i këtyre demonstratave lindi pasi opozita fajësoi Lukashenkon për manipulimin e rezultatit, ndërsa iu kërkua edhe dorëheqja e tij.
Protestat vazhdojnë ende edhe sot, por kryesisht gjatë fundjavës.
Helmimi i opozitarit rus Alexei Navalny
Lideri i opozitës ruse, Alexei Navalny, më 20 gusht u helmua me agjentin nervor Novichok.
Ai kishte filluar të ndihej keq ndërsa po fluturonte për në Moskë. Aeroplani u detyrua të bënte ulje të paplanifikuar në Omsk të Siberisë.
Për një kohë të gjatë ai ishte trajtuar në një spital në qytetin e Berlinit të Gjermanisë.
Helmimi i opozitarit rus me Novichok ishte konfirmuar edhe nga Organizata për Ndalimin e Armëve Kimike.
Një hulumtim i përbashkët midis Bellingcat, The Insider, Der Spiegel dhe CNN, ka zbuluar të dhëna që implikojnë Shërbimin rus të Sigurisë (FSB) në helmimin e kundërshtarit të Vladimir Putinit.
Vrasja e mësuesit në Francë
Një djalë 18-vjeçar me origjinë çeçene ia preu kokën një mësuesi në periferi të Parisit, pasi ky i fundit iu kishte demonstruar nxënësve të tij disa prej karikaturave të Profetit Muhamed në një orë civile mbi lirinë e shprehjes.
Përshkallëzimi i dhunës në Nagorni-Karabaku
Në fund të muajit shtator filluan përpleshjet midis Armenisë dhe Azerbajxhanit për rajonin e diskutueshëm Nagorni-Karabaku.
Palët të cilat nënshkruan një marrëveshje armëpushimi me ndërmjetësimin e Rusisë, e shkelën atë ku u raportua për disa përplasje.
Joe Biden fitoi zgjedhjet presidenciale të SHBA-së
Kandidati i demokratëve, Joe Biden, fitoi zgjedhjet presidenciale të 3 nëntorit, duke fituar kështu 306 vota elektorale.
Fitorja e tij u konfirmua më 14 dhjetor edhe nga Kolegji Zgjedhor në SHBA.
Vdekja e legjendës së futbollit, Diego Maradona
Ish-futbollisti argjentinas Diego Maradona, ndërroi jetë në moshën 60 vjeçare pas sulmit në zemër.
Astronautët u ngjitën për herë të parë në Stacionin Hapësinor Ndërkombëtar (ISS), me një kompani private
Kapsula e Spaxe X transportoi astronautët për Stacionin Hapësinor Ndërkombëtar, shtëpia e tyre e deri në pranverë.
