Një tjetër shtet mund të jetë në rrezik nga një aneksim eventual që mund t’i bëhet nga Rusia. Bëhet fjalë për Kazakistanin, shteti i nëntë në botë sa i përket shtrirjes territoriale.
Është televizioni shtetëror turk, TRT, që publion një shkrim me autorësi të Mansur Mirovalev me titull: “A duhet Kazakistani t’i frikësohet një pushtimi të ngjashëm me Krimenë?”
Shkrimi bazohet mbi qëndrimet e një deputeti të partisë në pushtet, Rusia e Bashkuar, Vyacheslav Nikonov, që në një dalje televizive në dhjetor ndër të tjera tha se, “Kazakistani thjesht nuk ka ekzistuar. Kazakistani i veriut ka qenë i pabanuar. Dhe aktualisht, territori i Kazakistanit verior është një dhuratë e madhe nga Rusia dhe Bashkimi Sovjetik.”
Ky qëndrim është kundërshtuar ashpër nga presidenti kazak, Kasym-Zhomart Takyev, por deputeti rus është kundërpërgjigjur duke u shprehur se “nëse nuk e konsideroni një dhuratë (veriun e vendit), kthejeni sepse e keni marrë në mënyrë ilegale.”
Edhe pse me një sipërfaqe pesë herë më të madhe se Franca, shteti euro-aziatik banohet vetëm nga rreth 19 milionë banorë dhe 19% të tyre janë rusë.
Gjithsesi, Kazakistani është një vend dominant në Azinë Qëndrore, me 60% të GDP-së së rajonit, kryesisht për shkak të burimeve të shumta të gazit dhe naftës. Si ish-pjesë e Bashkimit Sovjetik, ky shtet konsiderohet satelit i Rusisë, por edhe interest e Turqisë aty janë të mëdha. Vitet e fundit është vënë re edhe një rritje e prezencës së SHBA-së në Kazakistan.
