Kryetari i Aleancës Kosova e Re, Behgjet Pacolli, ka deklaruar se Albin Kurti dhe vartësit e tij kanë tentuar ta arrestojnë, duke iu referuar paralajmërimit që ish-ministri i Punëve të Brendshme Xhelal Sveçla kishte bërë për arrestimin e tij.
“Mua donin të më arrestonin pasi kisha bërë të gjitha testet, isha i shëndoshë dhe nuk kisha virus për ta sjellë në Kosovë, nuk kam refuzuar karantinimin. Albin Kurti me këlyshët e vet ka dashur të më arrestojë, unë kisha vend ku të shkoja në karantinim, nuk kam e refuzuar karantinim. Unë e shihja se mbështetësit e tij shkonin në shtëpi dhe tjerët rrinin në karantimin, unë e pashë sa është ora.
Ai ishte personi i parë që dëshironte të më arrestonte, në ora 01:00 të natës ai ka thënë se bashkë me drejtorin e Policisë së Kosovës, Rashit Qalajn dhe me ushtruesin e detyrës së Ministrit të Punëve të Brendshme, Xhelal Sveçlen do të vijnë të më arrestojnë. Por, për çfarë akoma nuk e kam kuptuar asnjëherë, ai të shkojë ta arrestojë vetveten dhe idiotizmin e vet dhe jo njerëzit e sinqertë dhe punëtorë. Dokrrat e Albin Kurtit i përkasin viteve të 70-ta, ato nuk i nevojiten Kosovës”, ka thënë Pacolli.
Ai u ka kërkuar qytetarëve që të votojnë partinë e tij të dielën e ardhshme në zgjedhjet parlamentare.
