Policia e Durrësit ka vënë në pranga një 51-vjeçar, i cili ditën e djeshme teksa transportonte me ambulancë një 70-vjeçare, ka përfunduar në kanal. Aksidenti ndodhi paraditen e djeshme, ndërsa si pasojë e aksidentit humbi jetën pacientja që transportohej me ambulancë.
Kjo e fundit, sipas burimeve mësohet se ishte prekur me Covid-19, dhe gjendja e saj ishte e rënduar. Nga shpejtësia e lartë por e favorizuar edhe nga lagështira në rrugë, ambulanca ka përfunduar në kanal.
“Specialistët e Qarkullimit Rrugor në Drejtorinë Vendore të Policisë Durrës arrestuan në flagrancë shtetasin I. D., 51 vjeç, banues në Sarandë, pasi më datë 14.02.2021, duke transportuar me autoambulancë nga Saranda në drejtim të Tiranës, një paciente në gjendje të rëndë shëndetësore, ka dalë nga rruga në autostradën Durrës-Tiranë, duke u përplasur me murin rrethues të një subjekti dhe për pasojë ka ndërruar jetë pacientja, shtetasja A. Sh., 70 vjeçe”, thuhet në njoftimin e policisë.
