Bashkimi Evropian në partneritet me Organizatën Botërore të Shëndetësisë ka nisur një projekt të ri rajonal me vlerë mbi 7 milion € për të mbështetur vaksinimin e sigurt dhe efektiv të popullsisë në të gjithë Ballkanin Perëndimor.
Ky projekt do të ndihmojë në përgatitjen e rajonit për pritjen dhe administrimin efektiv të vaksinave kundër COVID-19. Aktivitetet do të përfshijnë, ndër të tjera, zhvillimin dhe testimin e planeve emergjente, trajnimin për profesionistë të shëndetit dhe zhvillimin e sistemeve të menaxhimit të informacionit për vaksinat.
Vendim u bë publik nga Komisioneri për Fqinjësi dhe Zgjerim, Olivér Várhelyi:
“Me këtë projekt të ri për të mbështetur fushatat e vaksinimit në Ballkanin Perëndimor në partneritet me OBSH, BE vazhdon të japë prova për angazhimin e saj për të mbështetur partnerët tanë në luftimin e pandemisë që nga fillimi i saj “, tha Varhelyi.
Pas paketës së bërë publike ditën e sotme, BE ka investuar 25 milion € për përmirësimin e strategjive të vaksinimit në Ballkanin Perëndimor. Paketa totale e ndihmës së BE për Ballkanin Perëndimor në përgjigje të krizës së shkaktuar nga COVID-19 tejkalon 3.3 miliardë €, siç tregohet në Komunikatën e Komisionit për mbështetjen ndaj Ballkanit Perëndimor në trajtimin e COVID-19 dhe rimëkëmbjen pas-pandemike. Kjo përfshin mbështetjen e menjëhershme në pajisje, mbështetjen afatmesme dhe afatgjatë për sistemet shëndetësore dhe ekonomitë, mbështetjen për bizneset përmes bankave lokale, ndihmën makro-financiare në formën e kredive dhe një paketë përgjigje të Bankës Evropiane të Investimeve (EIB).
Për më tepër, BE është një nga mbështetësit më të fortë të COVAX, i cili mbetet mjeti më i mirë për të siguruar qasje të drejtë dhe të barabartë në këto vaksina dhe për të dhënë solidaritet ndërkombëtar të vaksinave. Team Europe ka kontribuar më shumë se 850 milion € për COVAX, 500 milion € nga buxheti i BE. Ky do të jetë një kontribut kryesor për COVAX për të siguruar 1.3 miliardë doza vaksinash për 92 vende me të ardhura të ulëta dhe të mesme deri në fund të vitit 2021.
