Katër të rinj nga Gjilani po pretendojnë se janë sulmuar nga gjashtë zyrtarë policorë (emra të njohur për redaksinë) mbrëmjen e së shtunës në një lokal në lagjen “Gavrani” në Gjilan.
Altin Isufi, vëllai i tij, Arbër Isufi dhe dy djemtë e hallës së tij, Arian Kadriu dhe Asdren Emini kanë denoncuar në Inspektoratin Policor gjashtë policë, të cilët, sipas deklaratës së tyre, kanë ushtruar dhunë brutale ndaj tyre, pa ndonjë arsye.
Altini ka dhënë versionin e tij të ngjarjes për Gazetën Sinjali.
Ai thotë se së bashku me tre familjarët e tij kanë hyrë në lokal rreth orës 21:40 dhe pasi kanë marrë nga një pije te banaku, janë ulur në një tavolinë të lirë brenda lokalit.
Përballë tyre, ai thotë se kanë qenë të ulur disa policë, gjashtë prej të cilëve i njohin me emër dhe mbiemër.
Altini thotë se këta policë pas disa minutave kanë shkuar te tavolina e tyre dhe pasi që i kanë fikur dritat, kanë filluar t’i godasin deri në alivanosje.
“Disa policë njërin prej tyre që e njoh, L.T (emër i njohur për redaksinë), ka qenë duke pirë alkool përball neve, sepse e njoh është i të njëjtit vend nga jom unë. Ai ka qenë aty duke pi me disa shokë. Qysh kem t’u bo muhabet t’u kesh ndërmjet veti ka ora 22:00, një person është ulur afër meje në tavolinën tonë. Më tha ‘Po ulna pa të pyet’, i thash ‘okay, ulu’.”
“Pastaj i pashë që na rrethun në tavolinën tonë disa persona, na kanë fikur dritat dhe kanë filluar të na godasin pa kontroll, deri në alivanosje”.
Altin Isufi thotë se është alivanosur për shkak të goditjeve, të cilat pretendon se i ka marrë nga zyrtarët policorë.
Ai thotë se kur është këndellur e ka parë veten jashtë lokalit, duke u mbajtur nga dy persona, derisa thotë se zyrtarët policorë në fjalë kanë ikur nga lokali.
