‘Mu errësuan sytë dhe e mbyta’- kështu u shpreh Babis Anagnostopulos, përballë policisë greke ditën e djeshme. Piloti grek, pranoi pas disa orësh marrje në pyetje se ai e kishte vrarë bashkëshorten e tij, Carolinë Crouch në prani të vajzës vetëm 1 vjeç.
Ai tregoi të vërtetën përballë oficerëve të policisë dhe se si e sajoi historinë e grabitjes. Motiv i krimit ka qenë sherri në çift pas vendimit të nënës 20-vjeçare për tu larguar nga banesa.
“Kohët e fundit kishim pasur fërkime. Ky debat doli sërish rastësisht atë mbrëmje. Në një moment ajo e hodhi fëmijën në krevatin e saj dhe më tha të ngrihesha dhe të largohesha nga shtëpia. Ajo më shtyu dhe më goditi me grushte. Mua mu errën sytë dhe e mbyta. Më pas sajova grabitjen”, ka thënë 32-vjeçari përpara hetuesve.
Ngjarja ka shokuar opinionin publik grek, pasi piloti 32-vjeçar tentoi shumë manovra me qëllim të mos zbulohej krimi që kishte kryer. Madje në një nga dëshmitë tij, piloti tha se kishte njëri nga grabitësit fliste gjuhën shqipe.
