Artistja e talentuar, Raffaella Carrà, e cila ndërroi jetë dy ditë më parë ishte një nga personazhet më të njohura të televizionit italian dhe më të dashurit për publikun nga mbarë bota.
Në një intervistë të mëparshme Carrà pati rrëfyer se planifikonte të tërhiqej nga skena për t’iu lënë vend artistëve të rinj por shkaku i vërtetë që pak njerëz dinin ishte sëmundja e saj.
Diva italiane ndërroi jetë të hënën në Romë në moshën 78- vjeçare, për shkak të një sëmundjeje që ajo vetë donte ta mbante të fshehtë, siç rrëfeu partneri i saj për më shumë se 35 vjet, Sergio Japino.
“Ishte një gjest dashurie ndaj adhuruesve të saj, në mënyrë që kalvari i saj personal të mos i shqetësonte kujtimin e ndritshëm ”, pohoi Japino.
Ylli i skenës italiane vuante nga kanceri i mushkërive për një vit.
Rafaela Carrà do të përcillet në banesën e saj të fundit të premten në orën 12, në kishën e Santa Maria në Ara Coeli. Në ceremoninë mortore do të jenë të pranishëm zyrtarë të lartë të shtetit si dhe personalitete nga bota e artit.
