Lionel Messi debutoi me skuadrën e tij të re PSG mbrëmjen e djeshme në fitoren kundër Reims duke u futur në fushën e lojës në pjesën e dytë.
Ishte një moment historik të shihje argjentinasin duke veshur një fanellë tjetër dhe jo atë të Barcelonës. Leo Messi zbriti në fushë për vetëm 25 minuta duke zëvendësuar shokun e tij, Neymar në minutën e 65’.
Argjentinasi bëri një paraqitje relativisht të mirë duke rikuperuar topin nga kundërshtarët dhe duke u munduar të depërtojë mbrojtjen e Reims me pasimet e tij gjeniale.
Megjithatë, miliona tifozëve në gjithë botën iu refuzua dëshira për të parë treshen e sulmit Messi-Mbappe-Neymar të luajnë të tre sëbashku në fushën e blertë. Ende nuk dihet nëse kjo gje do të jetë e mundur pasi përflitet për një transferim të mundshëm të Kylian Mbappe në Bernabeu.
Vëmendja e lojtarëve të Reims ishte e gjitha te Messi menjëherë pas zbritjes së tij në fushë. Kundërshtarët e ndalën “Pleshtin” falë disa ndërhyrjeve të ashpra duke i ofruar mirëseardhjen në ligën franceze yllit argjentinas. Debutimi i vërtetë i 6 herë fituesit të Topit të Artë pritet të vijë më 12 shtator në “Parc des Prince”, para mijëra tifozëve vendas të cilët janë gati të ndezin atmosferën në tribunë në sfidën ndaj Clermontit.
