Perspektiva e Ballkanit Perëndimor do të jetë në qendër të diskutimeve të ditës së nesërme në samitin e BE që zhvillohet në Slloveni. Por një apel ka ardhur nga kryeministri i Greqisë, Kyriakos Mitsotakis i cili në një deklaratë ka theksuar rëndësinë e integrimit të Ballkanit në BE.
Sipas tij, koha po përfundon dhe nëse BE nuk do të ndërmarrë asgjë konkrete për këtë rajon, të tjerët do të nxitojnë për të mbushur boshllëkun.
“Në Samitin e Jashtëzakonshëm të Bashkimit Evropian – Ballkani Perëndimor, ne do të kemi mundësinë të diskutojmë perspektivën evropiane të fqinjëve tanë. Tetëmbëdhjetë vjet pas Samitit të Selanikut, i cili për herë të parë hapi derën evropiane për vendet e Ballkanit Perëndimor, është koha për të bërë angazhime të qarta. Koha po mbaron dhe nëse Bashkimi Evropian mungon në këtë rajon nuk ka dyshim se të tjerët do të nxitojnë për të mbushur boshllëkun”, ka thënë kryeministri grek.
Ai u ndal më tej duke thënë se do të diskutohen çështje gjithëpërfshirëse që lidhen me politikën e jashtme botërore.
“Do të jetë një mundësi për mua që të informoj partnerët tanë për aleancën shumë të rëndësishme strategjike, marrëveshjen e bashkëpunimit që kemi nënshkruar me Francën. Dhe për të përsëritur nevojën për të përshpejtuar debatin mbi autonominë strategjike evropiane . Evropa më në fund duhet të jetë në gjendje të paktën të fillojë rrugën e përafrimit të fuqisë së saj ekonomike me fuqinë e saj gjeopolitike. Shpresoj që sot do të kemi mundësinë që ta bëjmë këtë diskutim në detaje”, u shpreh Mitsotakis.
