Gledis Nano, drejtori i Përgjithshëm i Policisë së Shtetit ka vlerësuar me Certifikatën për “Shërbime të Dalluara”, drejtorin e Departamentit të Policisë Kriminale, Drejtuesin e Parë, Edmond Rizaj, si dhe dy oficerëve të kësaj drejtorie.
Njëkohësisht edhe DEA në Departamentin e Drejtësisë të Shteteve të Bashkuara, vlerëson me Certifikatë për Shërbime të Dalluara, tre oficerë të Drejtorisë Hetimore në Departamentin e Policisë Kriminale në Policinë e Shtetit.
Në një ceremoni të veçantë ku ishte i pranishëm Ministri i Brendshëm, Drejtori i Përgjithshëm i Policisë së Shtetit, Gledis Nano u vlerësoi përkushtimin dhe profesionalizmin e Drejtorit të Drejtorisë Hetimore Edmond Rizaj dhe të oficerëve të tjerë të kësaj drejtorie, në ndjekjen dhe finalizimin e disa operacioneve të suksesshme kundër krimit të organizuar.
Nga ana tij, drejtori Edmond Rizaj theksoi se i gjithë stafi i Drejtorisë Hetimore është i fokusuar dhe i angazhuar maksimalisht për të bashkëpunuar me të gjitha agjencitë ligjzbatuese brenda dhe jashtë vendit, me qëllim kryerjen e hetimeve të përbashkëta për të goditur grupet kriminale brenda dhe jashtë vendit.
“Me certifikatë nga Drejtori i Përgjithshëm i Policisë së Shtetit Gledis Nano janë vlerësuar:
Drejtues i Parë Edmond Rizaj – i është akorduar “Certifikata për Shërbime të Dalluara” me motivacionin “Për përkushtimin dhe profesionalizimin e treguar në drejtimin e finalizimit me sukses të disa operacioneve policore të realizuara nga Drejtoria Hetimore në funksion të dokumentimit të aktivitetit kriminal të personave apo grupeve të strukturuara kriminale”.
Kryekomisar Saimir Durro – i është akorduar “Certifikata për Shërbime të Dalluara” me motivacionin “Për merita të veçanta, profesionalizmin dhe përkushtimin e treguar në përmbushjen cilësore të detyrave në shërbim të Policisë së Shtetit”.
Komisare Mirela Deda – i është akorduar “Certifikata e Karrierës” me motivacionin “Për merita të veçanta, profesionalizmin dhe përkushtimin e treguar në përmbushjen cilësore të detyrave dhe kontributin e dhënë gjatë viteve të punës, në shërbim të Policisë së Shtetit”.
Me Certifikatë për Shërbime të Dalluara, nga DEA në Departamentin e Drejtësisë të
Shteteve të Bashkuara, janë vlerësuar:
Kryekomisar Gjergj Oshafi
Kryekomisar Rezar Velmishi
Kryekomisar Loreta Alla
Me motivacionin “Për dedikim ndaj detyrës dhe shërbime të shquara.”- thuhet në njoftimin e Policisë së Shtetit.
