Kryeministri Edi Rama, ashtu sikundër hapi fushatën e vaksinimit, ka çelur sot siparin për marrjen e dozës së tretë të vaksinës anti-covid.
Kreu i qeverisë i është përgjigjur i pari thirrjes së Ministrisë së Shëndetësisë, duke bërë kështu dozën e tretë. Ai u paraqit në ambientet e stadiumit “Air Albania” ku iu nënshtrua këtij procesi, ndersa shoqerohej nga ministrja Manastirliu.
“Prit. Hajde zgjidhe ti kë të duash. Këtë do bëj tani unë. Se meqë thonë se i ka me ujë.”, i tha Rama mes batutash nje gazetareje.
Ndërkohë, kryeministri paralajmëroi edhe njëherë sot vaksinimin e detyruar të popullsisë.
“Ju them të gjithë atyre që në radhë të parë janë nënpunës të vaksinohem sepse mund të vijë momenti që ndalohen të shkojnë në punë, po u ndaluan nuk do paguhen. Ju them të gjithë atyre që kanë të bëjnë me veprimtarinë e tyre me hap. Ju them të gjithë atyre që kanë dyqane të vaksinohen sepse do vijë momenti që dyqani mbyllet.Ato që janë të pavaksinuar përfundojnë në kthetrat e vdekjes dhe e gjithë familja i bie kokës me grushte.
Ne po ndjekim me shumë vëmendje diskutimet me komitetin përkatës dhe duke parë se çfarë po ndodh përreth dhe do të vijë momenti që në Shqipëri nuk do të lejohen të pavaksinuarit. Kjo nuk është me detyrim, por është ajo që po bën gjithë bota, ato që nuk duan që të vaksinohen nuk mund të kërcënojnë të tjerët. Studentët do të vaksinohen pasi nuk do të lejohen që të futen në universitet. Unë po flas për kartën e gjelbër të vaksinimit.”, u shpreh Rama.
Kujtojmë se ministria e Shëndetësisë ka bërë sot thirrje që të marrin dozat e treta edhe moshat mbi 18 vjeç, 6 muaj pasi kanë marrë dozën e dytë.
