Në 7 janar të vitit 1943 vdes në New York, në moshën 86 vjeçare, Nikola Tesla.
Tesla, ishte një shpikës, inxhinier elektrik, inxhinier mekanik dhe futurist, i cili është më së miri i njohur për kontributet e tij në hartimin e sistemit të furnizimit me energji elektrike me rrymë alternative.
Puna e Teslas ra në errësirë relative pas vdekjes së tij, deri në vitin 1960, kur Konferenca e Përgjithshme për Peshat dhe Masat emëroi njësinë SI të densitetit të fluksit magnetik si Tesla, për nder të tij.
Me zbulimet dhe shpikjet e tij Nikola Tesla, bëri të mundur që i gjithë sistemi industrial të merrte një hov dhe një zhvillim të pamendueshëm dhe befasues.
Nga një kohë e energjisë mekanike të papërpunuar të avullit dhe të fillimeve të ndrojtura të motorrëve me djegie të brendshme, e cila nuk kishte asnjë shans që ta shtynte botën drejt zhvillimeve të sotme, Tesla bëri të lindte koha e shpërthimit gjigant të energjisë elektrike.
Kështu të gjithë ata që e njohin veprën e këtij gjeniu, bien në një mendje se Tesla e ndryshoi rrenjësisht jetën e të gjithë njerëzimit.
E ndërsa sot besohet se “babai” i elektrecitetit modern është Tomas Edisoni, e vërteta është krejt e ndryshme. Shpikjet e Edisonit dhe e shumë të tjerëve, as që mund të krahasohen me atë zhvillim madhështor që shkaktoi Tesla me gjeninë e tij krijuese.
