Një ditë pasi Silvio Berlusconi vendosi të mos kandidojë për president, mediat italiane raportojnë se ai ka qenë në spitalin “San Raffaele” në Milano.
Asgjë serioze për “kavaljerin” i cili ndodhet në spital vetëm për kontrolle rutinë. Më herët Berlusconi ka qenë në të njëjtin spital në muajin dhjetor, dhe në shtator ku iu nënshtrua kontrolleve klinike pas problemeve me aritminë kardiake.
Lajmi konfirmohet nga mjeku i spitalit Alberto Zangrillo i cili bën me dije: “Silvio Berlusconi ndodhet në spitalin San Raffaele që nga mëngjesi i sotëm dhe po i nënshtrohet kontrolleve klinike periodike, të planifikuara prej disa kohësh të përfshirë në një protokoll standard”.
Ai shpjegoi se Berlusconi priti që të kalonte momenti delikat lidhur me vendimmarrjen për presidencën, për të shkuar në spital.
Përballë hyrjes së spitalit ishin vendosur gazetarë dhe kameramanë, ndërkohë që makina dhe eskorta e tij ishte parkuar në krah të automjeteve të karabinierëve.
