Deputeti i Partisë Demokratike, Luan Baçi ka replikuar me kryeparlamentaren Lindita Nikolli, ndërsa akuzon këtë të fundit se nuk i jep fjalën kur ai e kërkon. Baçi shprehu një shqetësim se para një jave, kur kishte shkuar në sallën e Kuvendit, i ishte ndryshuar vendi në ulëse pa dijeninë e tij, ndërsa akuzoi se pas kësaj fshihet kryetari i PD-së, Lulzim Basha.
Sipas tij, pas përjashtimit nga grupi parlamentar i PD-së, pasi mbështet ish-kryeministrin Sali Berisha, vjen edhe kjo lëvizje nga Basha. Baçi tha se kjo tregon qartë dhe paktin që Basha ka bërë me maxhorancën.
“Në fakt doja t’ju thoja se në seancën e kaluar, kemi një sinjalizues këtu përpara ku ne kërkojmë fjalën. Ju ose bëni sikur nuk shikoni, ose neglizhoni. është në detyrimin tuaj që të zbatoni rregulloren dhe të na jepni fjalën kur e kërkojmë. Duhet të çohemi n këmbë ose të bërtasim për të marrë fjalën. Do e bëjmë këtë nëse nuk na kushtoni vëmendje. Të hënën kur erdha këtu, gjeta emrin e dikujt në vendin tim. Ndoshta zoti Basha mund të sjellë shkresa që të ndërrojmë vendet si nxënës dhe ju duhet të dënoni një nxënës për ta nxjerrë në rreshtin e fundit. Para se të bëni përjashtime nga grupi, pezullime, është në detyrën tuaj që ne të marrim informacion paraprak. Dikush më tha; emrin e ke në korridor, do rrish aty. këtë vend s’ma ka caktuar asnjë prej jush. Sa për dijeni, zoti Basha, unë jam deputeti më i votuar në qarkun e Fierit. Unë përjashtohem nga votuesit jo nga ju. Jam votuar nga demokratët. Është mbyllur historia me mbajtjes në krye të opozitës të një njeriu që është peng i maxhorancës. E ka mbyllur Kuvendi i 11 dhjetorit, për shkarkimin e tij dhe në 18 dhjetor ratifikimi i këtij vendimi.”, tha Baçi.
