Moskë – Lufta e Tretë Botërore sapo ka filluar! Është kjo deklarata e televizionit shtetëror rus, “Rossiya 1”.
Gazetarja Olga Skabeyeva u tha shikuesve se ofensiva e përshkallëzuar luftarake mund të quhet me plot gojën Luftë e III Botërore duke shprehur siguri të plotë për këtë.
“Ne patjetër që po luftojmë kundër infrastrukturës ushtarake të NATO-s, edhe pse jo drejtpërdrejt me aleancën. Kjo duhet pranuar”, tha Skabeyeva.
Kjo deklaratë, sipas gazetës britanike Mirror që citon noa.al, vjen pasi u bë e qartë nga Moska se ka humbur një agjent të inteligjencës në Ukrainë, duke i dhënë një goditje të madhe spiunazhit elitar të Kremlinit.
Kapiteni Alexey Bogomolov, i regjimentit të 25-të të forcave speciale të GRU (Stavropol), u vra gjatë një konflikti, zbuluan mediat në Rusi.
Analisti ushtarak Dmitry Drozdenko tha në Rossiya 1: “Në fakt, një luftë e plotë në shumë nivele është duke u zhvilluar me Perëndimin. Dhe Perëndimi ka kohë që po përgatitet për këtë luftë”.
Prezantuesja Olesya Loseva, përforcoi deklaratën kur u tha shikuesve se Perëndimi po furnizon Ukrainën me “miliona armë”.
Ajo tha se Ukraina po bën lojën e Perëndimit duke kryer “shumë provokime, të përgjakshme, të tmerrshme, krejtësisht të paimagjinueshme”.
“Ata pretendojnë se Rusia është një vend jo i denjë për të qenë në hartën e botës dhe se të gjithë rusët duhet të fshihen nga faqja e dheut”.
“Ukrainasit vetë janë ndërgjegjësuar. Ata nuk po shikojnë gjenocide, madje në Kharkiv, po i mirëpresin ushtarët tanë si çlirimtarë të vërtetë. Njerëzit po dalin me flamuj rusë në duar dhe po na mbështesin”, pretendoi gazetarja e njohur ruse.
