Mbyllet edhe java e dytë e Europa League. Nuk zhgënjejnë ekipet e mëdha, Manchester United fitoi në transfertë me rezultat 0-2 ndaj Sheriff, Roma fitoi 3-0 ndaj Helsinki, Betis mposht Ludgorets në shtëpi, kurse ajo që zhgënjeu gjithë tifozerinë ishte humbja e Lazios.
Ekipi lacial u shkatërrua në Danimarkë nga Midtjylland me rezultat 5-1. E ardhmja e Sarrit tashmë në rrezik….
Ndjekim disa nga titujt kryesorë të mediave sportive për ditë e sotme:
La Gazzetta dello Sport hapet me daljen në pension të Roger Federer: “Pashë një mbret”. Laver Cup do të jetë turneu i fundit për legjendën zviceriane të tenisit.
Corriere dello Sport hapet me periudhën e vështirë: “Kriza tek Allegri”. Trajneri juventin sheh fillimin më të vështirë në një sezon përgjatë karrierës së tij. Juventus e sheh veten me zero pike në Champions League dhe në vendin e tetë në Serie A.
“Allegri, fillo të vraposh” ka shkruar gazeta torineze Tuttosport. Juve nuk e merr parasysh hipotezën e përjashtimit, por trajneri ka përgjegjësinë për të korrigjuar situatën.
Katalanasja Mundo Deportivo hapet me titullin: “Dua të kem sukses këtu”. Gavi feston rinovimin e tij me Barçën deri në vitin 2026.
“Dera e medaljeve” është titulli kryesor i prestigjozes Marca. Sot Gjermani-Spanjë ora 20:30, për gjysmëfinalen e Eurobasket.
“Gavi e tashmja dhe e ardhmja” shkruan Sport. 5000 tifozë mblidhen në Camp Nou për të marrë pjesë në rinovimin e supertalentit Gavi deri në vitin 2026.
Gazeta madrilene AS hapet me gjysmëfinalen e Eurobasket Spanjë-“Muri i Berlinit”. Spanjollët do të përballen ndaj gjermanëve, në një sfidë ku këta të fundit janë favoritë.
“Një, dy, tre yje” është titulli i kryeqytetases “il Romanista”. Roma mposht Helsinkin me rezultat 3-0 në javën e dytë të Europa League dhe e sheh veten në vendin e tretë. Dybala mbetet protagonist absolut.
