Kryetari i PD-së Sali Berisha mbajti një konferencë shtypi ku akuzoi paraardhësin e tij Lulzim Basha se mban përgjegjësi individuale nëse ka marrë “fonde ruse” për lobim në SHBA. PD pritet të ngrejë një grup auditi të brendshëm për të kontrolluar të gjitha donacionet dhe lëvizjen e parave, por Berisha akuzoi Bashën se është mundur të fshijë çdo provë pak para se të largohej si kryetar.
Kryetari i Partisë Demokratike, Sali Berisha dukej disi i relaksuar në takimin e përjavshëm me gazetarët, ku qendër e konferencës ishte “dyshimi se Basha ka lobuar me fondet ruse”. Kryetari i PD-së Berisha deklaroi se do të ngrihet një komision auditi për të bërë transparencë për akuzat se PD është financuar nga Rusia në 2017. Në një komunikim me gazetarët, teksa u distancua nga kjo aferë, Berisha tha se do “kërkojmë hapjen e një hetimi të plotë për të larguar cdo dyshim që lidh PD me financimin rus”. Duke hequr çdo barrë mbi PD-në si institucion, Berisha u kujdes gjatë gjithë qëndrimit që mbajti që të bënte fajtor vetëm Bashën. “Përgjegjësia nuk është e PD, por është individuale e Bashës për aq sa përfaqësonte ai dhe atyre që janë përfshirë në këto transaksione. Duke distancuar nga kjo aferë personale e ish kryetarit të PD dhe duke u zotuar se do të ngremë një komision auditi për të bërë transparencë të plotë cfarë është e mundur nga ne, kërkojmë hapjen e një hetimi të plotë për të larguar cdo dyshim që lidh PD me financimin rus”-tha Berisha. Sipas tij, PD ka qenë dhe është e do mbetet parti e interesit kombëtar, e orientimit euroatlantik i Shqipërisë. “PD dhe Berisha ka denoncuar, ka kundërshtuar me protesta të fuqishme dhe dënon orientimin serbo rus të politikës së jashtëm aktuale në kuadër të Ballkanit të hapur. PD dënon mbrojtjen që Rama i bën qëndrimit filo rus të Beogradit, shndërrimin sot më shumë se kurrë pas agresionit”-theksoi ai.
Basha “fshiu” provat
Tashmë në PD, pjesa drejtuese e saj po artikulohet se Amerika ka të drejtë kur thotë se Basha loboi në shumën prej 500 mijë dollarësh që vinin si finacime nga oligarkë rus të lidhur me Putinin. “Vendimi për një audit është i drejtë, por ju them se Basha ka marrë cdo gjë me vete. Ka marrë disqet dhe cdo gjë. Kjo është e vërtetë, por partia duhet ta krijojë atë dhe mbi bazën e hetimi, se një qëndrim mendoj unë të dënueshëm ka mbajtur Rama me ndërhyrjet e tij në mbylljen e dosja. Unë e kam quajtur Bashën peng. Kjo u faktua. Demokratët duhet të ndihen krenarë që mbështesin Berishën”, theksoi nder të tjera Berisha. Gjithçka ka ndryshuar në pak muaj. Fillimisht Berisha është shprehur se ish-amsadori Donald Lu i kishte shkuar në zyrë në vitin 2018 dhe i kishte treguar për një dosje të cilën sipas ambasadorit amerikan (e rrëfyer nga Berisha), dyshohej që Basha kishte lobuar në Amerikë nëpërmjet një kompanie pas së cilës si finacues fshiheshin oligarkë rus të lidhur me Putinin. Berisha në atë kohë shprehet se e kishte refuzuar këtë qëndrim të Lu, duke u shprehur se ishte një shpifje që kishte për qëllim denigrimin e figurës së Bashës. Por pasi Berisha u shpall “non grata” nga SHBA në Maj të vitit të kaluar, nisi edhe “ndryshimi i mendimit” për Bashën. Ai e akuzoi si të shantazhuar nga Rama dhe Sorosianët në SHBA, duke i tundur dosjen me lobimet ruse.
Ranë nga qielli ato para?
Ish kryeministri Sali Berisha duke folur për të dhënat e zyrtarëve amerikanë për financimet ruse për PD-në në kohën që drejtohej nga Lulzim Basha tha se akuzat nuk krahasohen me atë që Departamenti i Shtetit ka thënë për Berishën në përcaktimin e tij non grata. Berisha shpjegoi se për Bashën ka një dosje, ka emra, të dhëna dhe solli në vëmendje dhe mbylljen e hetimit që u hap disa vite më parë për këtë çështje. “Në rastin tim, deri tani është një vendim pa asnjë fakt, argument e dokument. Ju nuk keni parë qoftë dhe një fakt të vetëm dhe unë kam deklaruar se fakti i parë i vetëm që të paraqitet, unë marr vendime, pa asnjë diskutim. Edhe 100 vite po të kërkojnë nuk do gjejnë një të vetëm e kur kam thënë këtë ka qenë vetëm një njeri që e dinte dhe një mik i imi, kam thënë dhe për fëmijët e mi kam barazuar me veten. Kurse në këtë rast flitet për personazhe ruse, me emra, Binjatën kompani ruse në Skoci, flitet për fonde 500 mijë dollarë, flitet për një dosje të mbyllur nga Rama me mashtrime e ka aq shumë dokumente pa përgjigje, ka mbyllje të një dosje pa asnjë hetim”-tha Berisha. Më tej shtoi se “Basha deklaroi se fondet i kam mbledhur në diasporë, cili prokuror shkoi në diasporë për të bërë hetimin? Cili shkoi në SHBA për të marrë në pyetje Nik Muzin? Prokurorët thirrën Arben Ristanin dhen një arkëtar, e rezultoi se asgjë nuk kishte hyrë e nuk kishte dalë nga arka e partisë, nga dolën 500 mijë dollarë? Këta nuk dinin gjë, kryetari e dinte, por kryetari u morr peng nga Rama. “Deal done” ti qeveris e unë bëhem vasali yt. E kam pyetur, i ke zbatuar rregullat e transaksioneve? Plotësisht tha. Se rregullat e transaksionet janë shumë të rëndësishme për të dalluar larjen e parave nga transfertat normale. Ranë nga qielli ato para? S’ka asnjë krahasim midis tyre dhe i them unë sa herë kam ftuar para jush SPAK që të hetojë cdo gjë? Unë kam deklaruar se jam gati të votoj ligjin për heqjen e parashkrimit për cdo ministër, duhet hequr e do e heq sa të vij në pushtet, që cdo ministër që firmos ta dijë mirë që nuk ka parashkrim, jo, do i mbetet gjithë jetën po ka firmos në kundërshtim me ligjin dhe Rama do e pësojë se ky do jetë një nga ligjet e para që do miratoj në qeveri”-përfundoi Berisha.
