Diana Armstrong ka 22 vite që nuk i pret thonjtë dhe aktualisht mban rekordin për thonjtë më të gjatë në botë. Në total, thonjtë e saj arrijnë një gjatësi prej 12 metrash dhe i duhen 15-20 shishe manikyr për t’i lyer.
64-vjeçarja amerikane hyri në Librin e Rekordeve Guinness në muajin gusht, por kjo ndoshta është gjëja e vetme pozitive e thonjve super të gjatë, pasi, siç tregon vetë Diana, e ka të vështirë të vishet, të hapë ushqimet apo edhe të përdorë tualetin.
Gruaja e moshuar i ka prerë për herë të fundit thonjtë në vitin 1997, megjithatë, siç shkruan New York Post, 64-vjeçarja nuk e kishte menduar asnjëherë të bënte histori falë kësaj.
Madje, ajo ka një histori tragjike.
Pikërisht në 1997, vajza e saj 16-vjeçare vdiq nga astma, dhe një natë më parë i kishte rregulluar dhe zbukuruar thonjtë të ëmës.
“Ajo ishte dita më e keqe e jetës sime… Një ditë më parë, ajo më lyeu thonjtë, kështu që pas kësaj nuk munda t’i prisja më thonjtë”, tha 64-vjeçarja.
Kështu, për gati 22 vite ajo nuk ka shkuar në asnjë sallon bukurie për t’i rregulluar.
