Një ngjarje e çuditshme ka ndodhur dy ditë më parë në Prekaz të Poshtëm të Komunës së Skënderajt në Kosovë.
Aty prehen trupat e 56 anëtarëve të familjes Jashari që humbën jetën në betejën e lavdishme të 5, 6 dhe 7 marsit të vitit 1998.
Së fundmi, një 26-vjeçare ka dhunuar varrin e heroit Adem Jashari, duke i vjedhur shkronjat.
Sipas Sinjalit, ngjarja është zbuluar ditën e djeshme dhe pas disa hetimeve u bë i mundur identifikimi i 26-vjeçares e cila u thirr në polici. Në dëshminë e saj e reja pohoi se ishte në gjendje të dehur dhe se shkronjat i mori për t’i mbajtur si kujtim.
Me urdhër të prokurorit, ndaj saj është iniciuar rasti ‘Dëmtimi, shkatërrimi dhe nxjerrja e paautorizuar e monumenteve ose objekteve të mbrojtura jashtë Republikës së Kosovës’.
Kujtojmë, që është një ndër vendet më të vizituara në Kosovë, jo vetëm nga vendasit, por edhe nga të huajt.
