Gerti Bogdani është emri i dytë që garon në këto primare për Tiranën. I pari që shpalli kandidaturën ishte Belind Këlliçi. Flitet se në këtë garë do të hyjë edhe mjeku Ilir Alimehmeti.
Në një intervistë për Euronews Albania, i pyetur nëse Këlliçi është më i favorizuar në këtë garë, duke qenë se ka qenë më pranë kryetarit Sali Berisha gjatë këtij viti, Bogdani u shpreh se kontributi në parti nuk matet me një vit por me vazhdimësinë.
“Nuk ka të bëjë aspak plus Berisha e ka bërë të qartë se të gjithë kandidatët janë të barabartë në garë. S’mund të shihet vetëm viti i fundit, pasi historia e tranzicionit është 30-vjeçare dhe nga tjetër është anëtarësia që do ta votojë dhe nxjerrë kandidatin. Kjo është nje nga risitë që ka sjellë Berisha dhe është një risi që e nxjerr një kandidat më të fortë se është ndryshe kur ke vetëm emërimin nga kryesia dhe ndryshe kur ke mbështetjen e të gjithë anëtarësisë dhe edhe përgjegjësia dhe përgjegjshmëria është më e madhe. Në këtë rast historia politike në Shqipëri nuk është 1-vjeçare”, tha Bogdani.
Bogdani i cilësoi primaret si një shpalosje platformash, pasi debati do jetë me kundërshtarin politik.
“Sfida do të jetë me kryetarin aktual të bashkisë. Shpresoj t’i nxjerrë demokratët më të bashkuar. Primaret janë një risi që e nxjerr një kandidat edhe më të fortë”, tha Bogdani.
