Shtetet e Bashkuara pajtohen me Bashkimin Evropian që zhvillimet e fundit në marrëdhëniet mes Kosovës dhe Serbisë, rrezikojnë përparimin e rëndësishëm që është arritur në dialogun mes këtyre dy vendeve, nën ndërmjetësimin e bllokut evropian.
Ambasadori amerikan në Serbi, Christopher Hill ka komentuar situatën e tensionuar në veri të Kosovës, pas largimit të përfaqësuesve të Listës Serbe nga institucionet e Kosovës.
Hill u ka bërë thirrje zyrtarëve serb të kthehen në institucione dhe se Kosova duhet të formojë Asosacionin dhe t’i pezullojë menjëherë masat për targat.
“Tërheqja e serbëve nga institucionet e Kosovës nuk është zgjidhje për mosmarrëveshjet aktuale dhe ka potencial për të përshkallëzuar më tej tensionet në terren. Prandaj, Shtetet e Bashkuara i bashkohen BE-së duke u bërë thirrje përfaqësuesve të Serbisë dhe serbëve të Kosovës që të respektojnë angazhimet e tyre nga dialogu dhe t’i kthehen detyrave të tyre në institucionet e Kosovës, duke përfshirë policinë, gjyqësorin dhe administratat lokale”, tha Hill .
Më tej Hill ka bërë me dije se Shtete e Bashkuara të Amerikës pajtohen me Bashkimin Evropian se zhvillimet e fundit mes Kosvës dhe Serbisë rrezikojnë përparimin e rëndësioshëm në dialogun e ndërmjetësuar nga BE-ja.
Ambasadori i SHBA-ve në Serbi u bëri thirrje të dyja palëve të zgjedhin rrugën e dialogut dhe të përmbahen nga veprimet që do të çonin në dhunë.
