78 vite më parë Tirana u çlirua nga pushtuesit nazifashistë.
Drejtoria e përgjithshme e Arkivave ka publikuar sot foto dhe dokumente lidhur me këtë ditë historike për kryeqytetin dhe gjithë Shqipërinë.
Në dokumentin e publikuar nga Arkivat i cili mban datën e 13 Nëntorit 1945, shkruhet se 17 Nëntori caktohet si festë lokale për Tiranën.
Ndërkohë në foto duket se si festonte populli i Tiranës përvjetorin e parë të çlirimit.
STATUSI I PLOTË
#SiSot, më 17 nëntor 1944, Tirana u çlirua nga pushtuesit nazifashistë. Çlirimi i kryeqytetit iu ngarkua Korparmatës së I-rë Sulmuese. Shtabi i korparmatës hartoi një plan operacioni të hollësishëm në bazë të planit operativo-strategjik të Komandës së Përgjithshme. Plani parashikonte krijimin e frontit të brendshëm dhe të jashtëm me qëllim mbylljen dhe goditjen e garnizonit gjerman brenda Tiranës. Operacioni u zhvillua në tri faza: faza përgatitore (12 shtator – 28 tetor), faza e parë e sulmit (29 tetor – 10 nëntor) dhe faza e sulmit përfundimtar (11 – 17 nëntor). Operacioni i mësymjes për çlirimin e Tiranës përfundoi me fitore, pas 19 ditë luftimesh të ashpra (29, 10, – 17, 11) brenda në qytet, si dhe gjatë rrugëve të komunikacionit që çonin drejt tij. Rol të veçantë për suksesin e operacionit luajti beteja e Mushqetasë. Lufta për çlirimin e Tiranës kishte karakterin e luftës së vërtetë ballore, ku u duk qartë shkalla e organizimit të UNÇSH-së. Në luftën për çlirimin e Tiranës, një kontribut të çmueshëm dha edhe populli i kryeqytetit. Më poshtë, dokumente dhe pamje mbi manifestimin e përvjetorit të parë të çlirimit të Tiranës.
