Altin Dumani mori këtë të hënë zyrtarisht detyrën e tij si drejtuesi i SPAK ku u zotua për luftën kundër krimit të organizuar dhe korrupsionit.
Por për ish-kreun e SHISH Fatos Klosi, të jesh në krye të institucionit ku hetohen “peshqit e mëdhenj” do një guxim të madh.
Klosi tha mbrëmjen e djeshme se në Shqipërinë e vogël po luhen interesa shumë të mëdha, teksa shton se njerëzit po pasurohen shumë shpejt.
“Për mua është detyrë shumë e vështirë. Unë e konsideroj që të tre ata njerëz që ishin në atë zgjedhje janë treguar shumë të guximshëm. Kemi 30 vjet dhe po diskutojmë për këtë problem. Po të ishte i kollajshëm do të ishte zgjidhur me kohë. Në Shqipëri, pasuria nuk ekzistonte atëhere. Të gjithë ishin njëlloj dhe çdo njeri bënte punën e vet. Sot gjërat kanë ndryshuar. Të gjithë njerëzit janë me interesa, të gjithë ata që i afrohen politikës, të gjithë ata që afrohen në detyra të rëndësishme etj, një pjesë e synimeve lidhen me paranë.
Jemi një vend i vogël që ata nuk i shpëtojnë dot. Shteti është punëdhënësi më i madh. Të gjithë duan të pasurohen shumë shpejt. Brenda 30 vitesh kanë luajtur interesa shumë të mëdha”, tha Klosi.
