Gjykata Kushtetuese ka njoftuar me një deklaratë shtypi rrëzimin e kërkesës së opozitës për hetimin parlamentar për çështjen Bechetti. Sipas Kushtetueses, rasti i paraqitur nga opozita nuk plotëson kushtet.
Gjykata Kushtetuese rrëzoi kërkesën e deputetëve të Partisë Demokratike, të cilët kishin kundërshtuar refuzimin e mazhorancës socialiste për të ngritur një komision hetimor parlamentar në lidhje me çështjen Bechetti.E mbledhur në seancë plenare këtë të martë, trupa e Gjykatës Kushtetuese ka pranuar ta gjykojë çështjen në themel. Ajo vlerëson se pretendimet e deputetëve të opozitës, nuk çojnë në përfundimin se në rastin konkret plotësohen standardet kushtetuese për ngritjen e komisionit hetimor.Vendimi është marre me shumicë votash dhe pritet të zbardhet i plote brenda afateve të përcaktuara. Më herët mazhoranca socialiste kishte refuzuar të ngrinte një komision hetimor parlamentar mbi çështjen Bechetti, me arsyetimin se cenohet interesi i vendit, për sa kohë shteti ishte në arbitrazh me sipërmarrësin italian. Deputetet e opozitës e kundërshtuan këtë vendim dhe i kërkuan Kushtetueses të zgjidhte konfliktin juridik. Në njoftimi i Gjykatës Kushtetuese thuhet se Gjykata ka juridiksion për shqyrtimin e kësaj çështjeje, pasi vendimi nr. 9, datë 28.03.2022 i kësaj Gjykate nuk përbën gjë të gjykuar, për rrjedhojë as pengesë në aspektin kushtetues. “Kërkuesi plotëson kriteret e legjitimimit, pasi kërkesa është paraqitur nga i njëjti subjekt që ka kërkuar edhe ngritjen e komisionit hetimor. Në lidhje me themelin e pretendimeve, Gjykata nuk arriti në përfundimin se në rastin konkret plotësohen standardet kushtetuese për ngritjen e komisionit hetimor.Për sa më sipër, Gjykata Kushtetuese, në mbështetje të neneve 77, 131, pika 1, shkronja “ç” të Kushtetutës, si dhe të neneve 54, 55, 56, 72 e vijues të ligjit nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, me shumicë votash vednosi rrëzimin e kërkesës”, thuhet në njoftim. Sipas Kushtetueses vendimi përfundimtar do të shpallet i arsyetuar brenda afateve ligjore të parashikuara nga ligji nr. 8577, datë 10.02.2000 “Për organizimin dhe funksionimin e Gjykatës Kushtetuese të Republikës së Shqipërisë”, i ndryshuar dhe nga Rregullorja për Procedurat Gjyqësore të Gjykatës Kushtetuese.Ky vendim është përfundimtar dhe hyn në fuqi ditën e botimit në Fletoren Zyrtare.
