Misioni paqeruajtës i KFOR në Kosovë, ka përshëndetur vendimin e marrë mbrëmë nga autoritetet për të hequr barrikadat në veri të vendit. Në reagimin e fundit, thuhet se barrikadat duhet të hiqen me qetësi dhe të shmangen incidentet.
Më tej, KFOR thotë se trupat janë në gatishmëri, për të ndërhyrë në çdo kohë, nëse është e nevojshme, në përputhje me mandatin që kanë në bazë të rezolutës së vitit 1999.
“KFOR-i mirëpret vendimin e mbrëmshëm për heqjen e barrikadave në veri të Kosovës. Heqja e barrikadave duhet të bëhet shpejt, në mënyrë të sigurt, duke shmangur çdo lloj incidenti apo rreziku. Të gjitha palët duhet të shmangin çdo retorikë apo veprim që mund të shkaktojë përshkallëzim të mëtejshëm.
KFOR-i po monitoron nga afër zhvillimet. Ne mbetemi jashtëzakonisht vigjilentë dhe të gatshëm për të ndërhyrë, nëse është e nevojshme, në përputhje me mandatin tonë të bazuar në Rezolutën 1244 të 1999″, thuhet në reagimin e misionit të KFOR.
Kujtojmë se, këto barrikada u vendosën në Veri pas arrestimit të ish-policit serb, Dejan Pantiq, të cilit dje iu ndryshua masa e sigurisë nga paraburgim në arrest shtëpiak. Menjëherë në mbrëmje autoritetet serbe njoftuan se do të hiqeshin barrikadat, dhe sot disa prej tyre janë larguar.
