Presidenti i Republikës, Bajram Begaj ka zhvilluar pasditen e sotme një takim me gazetarët për vitin 2023.
Gjatë fjalës së tij, Presidenti Begaj ka shprehur mbështetjen e institucionit që ai drejton për të gjithë gazetarët teksa ka thënë se një ndër detyrat e Presidencës është që të ju garantojë gazetarëve të gjithë mbështetjen që kërkon ligji.
“Tek unë dhe institucioni i Republikës do të gjeni dëgjuesin e kujdesshëm dhe gatishmëri që përfaqësuesit e medias të kenë trajtimin, mirënjohjen. Ju keni fuqinë e prezantimit të realiteteve. Ju siguroj se nuk do të ketë asnjëlloj kërkese për kohën dhe mënyrën e paraqitjes së këtyre realiteteve. Detyra jonë është që të ju garantojmë të gjithë mbështetjen që e kërkon ligji”, u shpreh Presidenti Begaj.
Gjatë fjalës së tij, Presidenti Begaj shprehu dhe shqetësimin e tij teksa tha se shpesheherë mediat shndërrohen në një fushë beteje.
“Shpeshherë mediat shndërrohen në fushë beteje. Shoqëria shqiptare nuk mund të lihet dhe të shfaqet si vartëse. Shqipëria është një vend i jashtëzakonshëm për arritjen e saj, vendi ynë është i veçantë dhe i rrallë për natyrën e tIj dhe për forcën e vullnetit shqiptar. Shqipëria është në rrugën e sigurtë. Media duhet të ketë fuqinë e së vërtetës, frymëzimit si shumë simotrat e saj me traditë demokratike”, tha Presidenti Begaj.
Në fund të fjalës së tij, Presidenti Begaj dha një mesazh për të gjithë gazetarët:
Mesazhi im sot: Të jeni frymëzues, referencë cilësie për të rinjtë që angazhohen me mediat dhe të arrini fuqinë e rolit që ju takon.
