Policia e Gramshit u njoftua se kishte ndodhur një vrasje në fshatin Tervol dhe menjëherë janë nisur për në vendngjarje.
Nga veprimet e para hetimore rezultoi se shtetasi Xhevit Sinani, 80 vjeç, për motive të dobëta ka qëlluar me sëpatë gruan e tij Zegjine Sinani, 74 vjeçe. Menjëherë pas ngjarjes ka lënë banesën e tij ku kreu krimin dhe është drejtuar për në shtëpinë e vëllait të tij Shaqir Sinani, 73 vjeç dhe ka qëlluar për vdekje edhe vëllain e tij i cili jetonte rreth 1 kilometër larg nga banesa e autorit.
Policia ka arrestuar në kohë rekord autorin e ngjarjes dhe ka sekuestruar në cilësinë e provës materiale mjetin sëpatë me të cilin dyshohet se është kryer krimi.
Njoftimi i policisë:
Gramsh
Shërbimet e Komisariatit të Policisë Gramsh, pas marrjes së njoftimit, rreth orës 14:50, se në fshatin Tervol, Gramsh, kishte ndodhur një krim i dyfishtë, janë nisur menjëherë drejt vendngjarjes.
Nga veprimet e para hetimore rezultoi se shtetasi Xh. S., 80 vjeç, dyshohet se për motive të dobëta, ka vrarë, me send të mprehtë (sëpatë), bashkëshorten e tij, shtetasen Z. S., rreth 74 vjeçe, e cila ndodhej në banesë, dhe më pas ka vrarë vëllanë e tij, shtetasin Sh. S., 73 vjeç, i cili ndodhej në territorin e banesës së tij, rreth 1 kilometër larg nga banesa e autorit.
Fale veprimeve të shpejta të shërbimeve të Policisë u bë kapja dhe shoqërimi i autorit, për në Komisariatin e Policisë Gramsh për veprime të mëtejshme.
Në cilësinë e provës materiale është sekuestruar mjeti i mprehtë sëpatë me të cilën autori dyshohet që ka kryer krimin e dyfishtë.
Grupi hetimor, nën drejtimin e Prokurorisë, vijon punën për zbardhjen e plotë të rrethanave të ngjarjes.
