Kryetari i opozitës, Sali Berisha, ka kërkuar sot nga qeveria që të shtojë ndihmat për vendet e goditura nga tërmeti, sidomos për Turqinë mike, pasi ato deri tani nuk kanë qenë në lartësinë e duhur siç e meriton dhe siç i detyrohet Shqipëria.
Duke ndjekur në vazhdimësi zhvillimet dhe njoftimet për jetët e humbura dhe të plagosurit në Turqi dhe Siri, Berisha bëri këtë shënim në rrjetet sociale:
“Tërmet me pasoja kataklizmike! Tërmeti që godit Turqinë qendrore dhe Sirinë verilindore ishte një kataklizëm e vërtetë. Numri i viktimave të këtij tërmeti arriti në të paktën 34.179 të dielën. Numri i të plagosurve është shumë më i madh. Ky ishte tërmeti më vdekjeprurës për Turqinë, që nga viti 1939. Edhe dje, pas 6 ditësh, ekipet e kërkim-shpëtimit kanë nxjerrë nga rrënojat disa të mbijetuar.
Ndihma të mëdha kanë shkuar nga e gjithë bota. Ndonëse Shqipëria dërgoi ekip kërkim-shpëtimi dhe ndihma në Turqi, këto nuk ishin në lartësinë e duhur dhe në detyrimin tonë ndaj një vendi fqinj dhe mik.
Dhe njëherë shpreh ngushëllimet e mia më të ndjera familjeve të viktimave të këtij tërmeti kataklizmik dhe lutem për shërimin e shpejtë të të plagosurve.
Gjithashtu kërkoj shtimin e ndihmave të Shqipërisë për kapërcimin e pasojave të tmerrshme të tërmetit.”, shprehet në mesazhin e tij kryedemokrati Sali Berisha.
