Presidenti Bajram Begaj ka folur për sigurinë kibernetike dhe sulmet nga Irani.
Ai e vlerësoi si shqetësues këtë fakt, por shtoi se Shqipëria arriti të rikuperohet nga sulmi falë bashkëpunimit me partnerët strategjikë dhe NATO-n.
Ndërkaq Begaj “mburri” qeverinë duke thënë se ka një plan ambicioz për forcimin e kapaciteteve digjitale dhe mbrojtëse kibernetike.
“Shqipëria vlerëson shqetësues kërcënimin që vjen nga Irani.
Në korrik dhe shtator të vitit të kaluar ne u përballëm me një sulm të rëndë kibernetik të ndërmarrë dhe të sponsorizuar nga struktura shtetërore të Republikës Islamike të Iranit.
Shqipëria në bashkëpunim të ngushtë me partnerët strategjikë dhe NATO-n, arriti ta ndërpresë dhe të rikuperohet nga ky sulm, si edhe ka ndërprerë marrëdhëniet diplomatike me Republikën Islamike të Iranit.
Qeveria shqiptare ka një plan ambicioz për forcimin e kapaciteteve digjitale dhe mbrojtëse kibernetike. Bashkëpunimi me NATO-n në këtë drejtim vlerësohet maksimalisht”, tha Begaj.
