Drejtuesi politik i qarkut të Elbasanit, Damian Gjiknuri ka prezantuar kandidatin dhe kryebashkiakun e Belshit, Ari Tafani.
Gjatë fjalës së tij Gjiknuri tha se kryeministri Edi Rama ka marrë vendime të cilat po i vijnë në ndihmë qytetarëve si rritja e pensioneve dhe rritja e pagave.
Më tej në fjalën e tij Gjiknuri tha se opozita po sulmon qeverinë për vendimet e marra pasi nuk i vjen mirë.
“Qeverisja e Edi Ramës, pavarësisht vështirësive e ka kthyer shumë vëmendjen në dimensionin social. Jo më kot të gjitha ato vendime, që tani po na i sulmojnë e që s’ju vjen mirë, që kanë të bëjnë edhe me shpërblimet për pensionistët, janë një dimension human që i shkojnë direkt pensionistëve për të zbutur efektet që kanë pasur rritjet e çmimeve. Këtë e ka bërë qeveria socialiste, prandaj dhe ne ndjehemi krenar për këtë. Edhe vendimi i fundit për rritjen e pagave është i rëndësishëm për të mbajtur të rinjtë dhe të rejat tanë në këtë vend për të punuar dhe në administratë shtetërore, për të qenë dhe konkurent me pagat që ofron privati, por mbi të gjitha dhe për të kontribuuar te fondi i pensioneve. Kjo do të jetë garancia për të rritur dhe pensionet”, deklaroi ai.
