Ish-kryeministri Sali Berisha shquhet për deklaratat e tij të bujshme por shpeshherë edhe të çuditshme. Perla e ditës së sotme duhet të jetë padyshim më e veçanta në këtë listë.
Sot ai u shpreh se rikthimi i tij dhe Partisë Demokratike në krye të pushtetit është i ngjashëm me rikthimin e Steve Jobs në kompaninë Apple në vitin 1996. Ndonëse tingëllon pak qesharake, Berisha ishte mjaft i bindur në arsyetimin e tij duke thënë se rikthimi i tij do të jetë më i suksesshmi.
Por le të analizojmë pak këto dy karaktere kaq të ndryshëm, por që për doktorin janë ‘sozi’ të padiskutueshme. Steve Jobs u përjashtua nga drejtimi i kompanisë së Apple në vitin 1985, kur ai ishte thjesht 30 vjeç. Më vonë do të rikthehej aty ku gjithçka nisi, 11 vite më vonë në moshën 41 vjeçare. Nga ana tjetër Berisha është gati dyfishi i moshës së gjeniut amerikan asokohe, saktësisht 78 vjeç, e megjithatë pretendon se do të tejkalojë energjinë dhe vendosmërinë e Steve Jobs.
Steve Jobs në një deklaratë vite para ndarjes nga jeta, u shpreh se ai kurrë nuk e bëri punën e tij për para, por për pasion. Edhe Berisha duket se ndan të njëjtin pasion për gjërat, por ndryshe nga Jobs, doktori është i motivuar nga pushteti edhe në këtë moshë që aktualisht gjendet.
