Ministrja e Arsimit Evis Kushi ka reaguar në lidhje me dhunimin e mësueses në ambientet e shkollës 9-vjeçare “Nimete Progonati” në Memaliaj, e cila u godit nga mbesa e një nxënëseje.
Përmes një reagimi në facebook, ministrja Kushi thekson se pavarësisht arsyeve dhuna nuk është mënyra e duhur për zgjidhjen e konflikteve.
Ministrja shpreh soldiaritetin me mësuesen dhe thekson se nuk do të tolerohet asnjë rast i dhunës në sistemin arsimor.
“Jam shumë e indinjuar nga rasti i dhunës së ushtruar mbi një mësuese në mjediset e shkollës 9-vjeçare “Nimete Progonati” në Memaliaj.
Pavarësisht arsyeve që kanë shkaktuar këtë ngjarje, dhuna nuk është asnjëherë mënyra e duhur për zgjidhjen e konflikteve. Në institucionet tona arsimore funksionojnë të gjitha strukturat e nevojshme për menaxhimin dhe zgjidhjen e situatave problematike.
Edhe pse është një rast i izoluar, për të cilin u morën masa të menjëhershme që ditën e djeshme, unë shpreh solidaritetin dhe u bëj thirrje nxënësve, prindërve dhe gjithë shoqërisë që ta trajtojmë mësuesin me respektin dhe dinjitetin që meriton.
Ne nuk do të tolerojmë asnjë rast dhune, as ndaj nxënësve e as ndaj mësuesve, atyre që edukojnë me dashuri fëmijët tanë dhe përgatisin me përgjegjshmëri brezat e ardhshëm.
Dua të garantoj të gjithë prindërit që ne do të vazhdojmë të punojmë me përkushtim dhe do të marrim të gjitha masat që shkolla të jetë gjithmonë një mjedis i sigurt, i ngrohtë dhe i shëndetshëm për edukimin dhe mirëqenien e nxënësve tanë”, tha Kushi.
