Drejtuesja politike e PS për Dibrën në një takim me gratë dhe vajzat e këtij qarku tha se nuk duhet të humbet kohë por duhet të ecim përpara për ta bërë Shqipërinë një vend më të mirë për të rritur fëmijët tanë.
“Për mua si mbesë Dibre por si një person që e do Matin shumë se janë njerëz të mirë, është nder që PS më ka dhënë të drejtoj këtë qark, ku njerëzit kujtojnë se gratë janë jo si pjesa tjetër e Shqipërisë dhe nuk e dinë se gratë e Gibrës janë shumë më të forta se pjesa tjetër e grave të Shqipërisë dhe për më tepër këtu drejtojnë gratë.
Shqipëria është grua, është si ju, si unë. Shqipëria është si ne.
Është një grua e vuajtur që është dashur të kalojë halle dhe probleme si të gjitha gratë që duhet të jenë më të përgjegjshme se burrat, si nënat tona që na kanë rritur me halle.
Si unë edhe si ju që duhet t’i rrisim fëmijët dhe të kujdesemi për prindërit tanë.
Shqipëria është si ne dhe e dini pse sepse nuk ka kohë për të humbur.
Shqipëria nuk ka kohë për të humbur dhe duhet të ecë vetëm përpara sepse duhet të rrisim fëmijët tanë në një vend siç e meritojnë, në një vend që zoti i ka falur pasuritë natyrore. Por këto duhen bërë me punë.”, tha mes të tjerash Balluku.
