Komisioni Qëndror i Zgjedhjeve ka bërë një thirrje të fortë për institucionet, lidhur me fushatën elektorale për zgjedhjet e 14 majit.
KQZ i bën ultimatum institucioneve të fshijnë menjëherë çdo postim apo ripostim me karakter elektoral nga faqet e tyre zyrtare në platformat sociale.
Në deklaratë thuhet se vënia në dispozicion e faqeve zyrtare në rrjetet sociale të institucioneve përbën shpërdorim të burimeve publike.
“Urdhëresë nga KQZ. Të fshihet menjëherë çdo postim apo ripostim me karakter elektoral nga faqet zyrtare të institucioneve në platformën “Facebook” apo të çdo mjeti tjetër elektronik (media sociale).
Vënia në dispozicion e faqeve zyrtare në “Facebook” apo çdo mjet tjetër elektronik (media sociale) të institucioneve publike për publikimin dhe ripostimin e veprimtarive me karakter politik/elektoral në zgjedhje, nga ana e këtyre institucioneve, përbën shpërdorim të burimeve publike.
Gjithashtu, përbën shpërdorim të burimeve publike vënia në dispozicion e faqeve zyrtare në “Facebook” apo çdo mjeti tjetër elektronik (media sociale) të institucioneve publike për publikimin e postimeve të cilat përmbajnë hashtagë (#), slogane me karakter politik/elektoral në zgjedhje, apo thirrje për mbështetje në zgjedhje nga ana e këtyre institucioneve”, thekson KQZ.
