Nisma Thurje mbylli fushatën zgjedhore, në një event ku u dhanë mesazhe për ndryshimin e klasës politike në vend dhe për nevojën që Tirana dhe e gjithë Shqipëria të dalë nga stanjacioni tridhjetëvjeccar.
Fokusi i aktivitetit ishin historitë e qytetarëve të Tiranës, të cilët vuajnë pabarazinë në rritje dhe mungesën e një opozite në Këshillin Bashkiak.
Në këto zgjedhje Nisma Thurje kandidon vetëm për Këshillat Bashkiak, dhe kryetari i Nismës Thurje, Endrit Shabani, u zotua se nga java tjetër ata do të çojnë në Këshillin bashkiak atë zë opozitar që ata deri më sot e kanë treguar në SPAK apo në sheshe.
“Ka ardhur koha për të thyer sërish bustet e atyre që duan ta mbajnë Shqipërinë peng dhe nga java tjetër ne do tu tregojmë se si bëhet, duke nxjerrë në pension këtë klasë politike, dhe duke nisur rrugën e një transformimi të plotë.
Sepse një Tiranë krejt ndryshe është plotësisht e mundur dhe ne do ta bëjmë realitet” shpreh Shabani.
Kandidati tjetër për Këshillin Bashkiak të Tiranës, Pano Soko u shpreh se beteja e tyre do jetë për të mbrojtur taksat e qytetarëve të Tiranës, dhe se duke luftuar me ata që fusin duart në buxhetin e qytetit, ne do kemi mundësinë të ndërtojmë një Tiranë evropiane, siç e meritojmë.
“Ne ndodhemi në mes të Evropës, dhe duhet të bëhemi si gjithë pjesa tjetër e Evropës. Dhe ky është misioni që ne i kemi vënë vetes, dhe nis tani, por do vazhdojë edhe në 2025-ën, edhe në 2027-ën”, tha Soko.
